కందుకూరుకు కృష్ణా జలాలు.. శాశ్వత నీటి పరిష్కారానికి ఎమ్మెల్యే విజ్ఞప్తి

సీఎం చంద్రబాబు, డిప్యూటీ సీఎం పవన్ కళ్యాణ్‌కు ఎమ్మెల్యే ఇంటూరి నాగేశ్వరరావు వినతి

ఉదయగిరి: వెలిగొండ ప్రాజెక్టు నుంచి కృష్ణా జలాలను కందుకూరు నియోజకవర్గానికి తరలించి తాగు, సాగునీటి సమస్యలకు శాశ్వత పరిష్కారం చూపాలని కందుకూరు ఎమ్మెల్యే ఇంటూరి నాగేశ్వరరావు ముఖ్యమంత్రి నారా చంద్రబాబు నాయుడు, ఉపముఖ్యమంత్రి పవన్ కళ్యాణ్‌ను కోరారు. మంగళవారం ఉదయగిరి నియోజకవర్గ పర్యటనకు వచ్చిన ముఖ్యమంత్రి, ఉపముఖ్యమంత్రికి ఎమ్మెల్యే వినతి పత్రాలు అందజేశారు.

అన్ని చెరువులను కృష్ణా జలాలతో నింపాలి

వలేటివారిపాలెం, లింగసముద్రం, కందుకూరు మండలాలకు పూర్తిస్థాయిలో సాగునీరు అందేలా చర్యలు తీసుకోవాలని ఎమ్మెల్యే కోరారు. వెలిగొండ తూర్పు కాలువ 103వ కిలోమీటర్‌ నుంచి ప్రత్యేక కాలువ ఏర్పాటు చేసి మూడు మండలాల్లోని చెరువులను కృష్ణా జలాలతో నింపాలని విజ్ఞప్తి చేశారు.

వెలిగొండ తూర్పు కాలువ నుంచి సుమారు 100 కిలోమీటర్ల మేర ప్రత్యేక కాలువ ఏర్పాటు చేసి, మార్గమధ్యంలోని ఇరువైపులా ఉన్న చెరువులకు నీటిని మళ్లించేలా ప్రణాళిక రూపొందించాలని సూచించారు. పాలేరు, మన్నేరు మధ్య ప్రాంతంలోని చెరువులకు నీరు అందితే ఈ ప్రాంతంలో సాగునీటి సమస్యకు శాశ్వత పరిష్కారం లభిస్తుందని తెలిపారు.

వలేటివారిపాలెం మండలం నుంచి కందుకూరు మండలంలోని పలుకూరు చెరువు వరకు కృష్ణా జలాలు చేరేలా సర్వే నిర్వహించి, అవసరమైన నిధులు మంజూరు చేయాలని ముఖ్యమంత్రిని ఎమ్మెల్యే కోరారు.

రాళ్లపాడు రిజర్వాయర్‌కు 1.7 టీఎంసీల నీరు

వెలిగొండ ప్రాజెక్టు నుంచి రాళ్లపాడు రిజర్వాయర్‌కు పూర్తిస్థాయిలో నీరు సరఫరా చేసేలా చర్యలు తీసుకోవాలని ఉపముఖ్యమంత్రి పవన్ కళ్యాణ్‌కు ఎమ్మెల్యే నాగేశ్వరరావు మెమొరాండం అందజేశారు.

వెలిగొండ ప్రాజెక్టు తూర్పు కాలువ 129వ కిలోమీటర్‌ నుంచి ప్రత్యేక కాలువ ద్వారా రాళ్లపాడు రిజర్వాయర్‌కు 1.7 టీఎంసీల నీటిని విడుదల చేసేందుకు గతంలోనే జీవో జారీ అయిందని ఎమ్మెల్యే గుర్తు చేశారు. ఈ ప్రతిపాదన కార్యరూపం దాల్చితే సుమారు 25 వేల ఎకరాలకు సాగునీరు అందడంతోపాటు వలేటివారిపాలెం, లింగసముద్రం, గుడ్లూరు మండలాలకు తాగునీటి సమస్య కూడా పరిష్కారమవుతుందని వివరించారు.

ఈ ప్రాజెక్టుకు అవసరమైన ప్రత్యేక నిధులు కేటాయించి పనులు ముందుకు తీసుకెళ్లాలని ఉపముఖ్యమంత్రిని ఎమ్మెల్యే కోరారు.

తాగునీటి సమస్యకు శాశ్వత పరిష్కారం

మరోవైపు సభా వేదికపై ముఖ్యమంత్రి చంద్రబాబు నాయుడు కూడా రాళ్లపాడు రిజర్వాయర్ అంశాన్ని ప్రస్తావిస్తూ, రిజర్వాయర్ ద్వారా తాగునీటి సమస్యకు శాశ్వత పరిష్కారం చూపేందుకు ప్రభుత్వం చర్యలు తీసుకుంటుందని ప్రకటించారు.

అంతకుముందు హెలిప్యాడ్ వద్ద ముఖ్యమంత్రి చంద్రబాబు నాయుడు, ఉపముఖ్యమంత్రి పవన్ కళ్యాణ్‌కు ఎమ్మెల్యే ఇంటూరి నాగేశ్వరరావు స్వాగతం పలికారు.